సీనియర్ సిటిజన్లకు ఆయుష్మాన్ భారత్‌.. నమోదుపై రాష్ట్రాలకు కేంద్రం కీలక ఆదేశాలు

ఆయుష్మాన్‌ భారత్‌ ఆరోగ్య బీమా పథకాన్ని (AB-PMJAY) 70 ఏళ్లు, ఆ పైబడిన వారందరికీ వర్తింపజేస్తూ కేంద్ర ప్రభుత్వం నిర్ణయం తీసుకున్న విషయం తెలిసిందే. తాజాగా, ఇందుకు సంబంధించిన ప్రయోజనాలు కల్పించడంలో భాగంగా అర్హుల పేర్లను నమోదు (Enrolment) ప్రక్రియ చేపట్టాలని అన్ని రాష్ట్రాలు, కేంద్రపాలిత ప్రాంతాలకు కేంద్ర ఆరోగ్య శాఖ సూచించింది. ఈ మేరకు కేంద్ర ఆరోగ్యశాఖ అదనపు కార్యదర్శి ఎల్‌ఎస్‌ చాంగ్‌సన్‌ లేఖ రాశారు. ఈ పథకంతో ప్రయోజనం పొందాలనుకునే సీనియర్‌ సిటిజన్ల నమోదుకు ఆయుష్మాన్‌ మొబైల్‌ యాప్‌ (Ayushman), వెబ్‌సైట్‌లో (Beneficiary.nha.gov.in) ప్రత్యేక విభాగం ఏర్పాటు చేసినట్లు లేఖలో పేర్కొంది.నమోదు చేసుకున్న అర్హులందరికీ ప్రత్యేకంగా ఆయుష్మాన్‌ కార్డులను జారీ చేస్తామని తెలిపింది. ఈ రిజిస్ట్రేషన్‌ ప్రక్రియ నిరంతరం కొనసాగుతుందని, పథకం కూడా త్వరలోనే అమల్లోకి వస్తుందని వెల్లడించింది. ఇప్పటికే ఆయుష్మాన్ భారత్ యోజన కింద లబ్ధిపొందుతున్న కుటుంబాలతోపాటు ఇప్పటివరకు ఈ పథకంలో లేనివారికీ ఇది వర్తిస్తుందని కేంద్ర ఆరోగ్యశాఖ స్పష్టం చేసింది. సామాజిక, ఆర్ధిక సితిగతులో సంబంధం లేకుండా 70 ఏళ్ల వయసు, ఆపైబడి వారందరూ అర్హలేనని లేఖలో తెలిపింది. ఇతర బీమా పథకాల్లో కొనసాగుతున్న లబ్ధిదారులు కూడా దీని ద్వారా ప్రయోజనం పొందవచ్చని సూచించింది.

నమోదు ప్రక్రియలో కేవలం ఆధార్ కార్డు మాత్రమే ఉంటే చాలని, అర్హులైన సీనియర్ సిటిజన్లకు ఆయుష్మాన్ కార్డుల జారీకి ఆధార్ ఆధారిత ఈ-కేవైసీ తప్పనిసరి అని చాంగ్‌సన్ తన లేఖలో వివరించారు. ఇతర కేంద్ర, రాష్ట్ర ప్రభుత్వ ఆరోగ్య బీమా పథకాలతో ప్రయోజనం పొందుతున్న లబ్ధిదారులు.. ప్రస్తుత పథకం లేదా AB PMJAY స్కీమ్‌లో ఏదైనా ఒకదానిని ఎంచుకోవడానికి ఒక్కసారి ఆప్షన్ ఇవ్వనున్నట్టు తెలిపారు.

‘ఇప్పటికే AB PM-JAY కింద లబ్దిపొందుతున్న కుటుంబాలలో 70 సంవత్సరాలు, అంతకంటే ఎక్కువ వయస్సు ఉన్న సీనియర్ సిటిజన్‌లకు ఏడాదికి రూ.25 లక్షల వరకు అడిషినల్ షేర్డ్ టాప్-అప్ అందజేయనున్నాం.. ఈ టాప్-అప్ మొత్తం రూ.5 లక్షలు కుటుంబసభ్యుల కొంత భాగాన్ని వినియోగించినా సీనియర్ సిటిజన్‌ల చికిత్స కోసం పూర్తిగా వాడుకోవచ్చు’ అని పేర్కొంది.