భారీ కాయం, ఆహారపు అలవాట్లు తెచ్చిన తిప్పలు.. పాక్ క్రికెట్‌లో దుమారం

పాకిస్థాన్‌ క్రికెట్‌లో ఇటీవల ఆజమ్ ఖాన్‌ అనే పేరు ఎక్కువగా వినిపించింది. భారీ కాయంతో ఉండే ఈ వికెట్‌ కీపర్‌.. తన ఆహారపు అలవాట్లు, వికెట్ కీపింగ్‌, బ్యాటింగ్‌తో విమర్శల పాలయ్యాడు. కొన్నిసార్లు తన తప్పు లేకుండానే ఈ ప్లేయర్‌పై విమర్శలు వచ్చాయి. ప్రదర్శన బాగాలేకున్నా.. బంధు ప్రీతితోనే అతడిని టీ20 ప్రపంచకప్‌ 2024కు ఎంపిక చేశారనే ఆరోపణలు వచ్చాయి. జట్టు మాజీ కెప్టెన్‌ కుమారుడు కాబట్టే అతడికి అవకాశాలు వచ్చాయని పలువురు మాజీలు విమర్శించారు. ఇదిలా ఉండగా.. పాకిస్థాన్ మాజీ కెప్టెన్‌ మొయిన్‌ ఖాన్‌ మాత్రం మరో రకమైన వాదన చేస్తున్నాడు. పాకిస్థాన్‌ క్రికెట్ బోర్డు (పీసీబీ) తన కుమారుడు కెరీర్‌ను కావాలనే నాశనం చేసిందని ఆరోపించాడు. పీసీబీ మాజీ హెడ్‌ రమీజ్‌ రాజా ఇష్టారీతిన వ్యవహరించి తన కుమారుడు లాంటి యువ ఆటగాళ్ల భవిష్యత్తును ప్రమాదంలో పడేశాడని పేర్కొన్నాడు. అతడు తీసుకున్న నిర్ణయాల వల్లే ప్రస్తుతం పాకిస్థాన్‌ క్రికెట్‌ జట్టు పరిస్థితి ఇలా తయారైందని విమర్శించాడు.‘టీ20 ప్రపంచకప్‌ 2024లో పాకిస్థాన్ ఆడిన మ్యాచులు అన్నీ నేను చూశా. జట్టులో వికెట్‌ కీపర్‌ బ్యాటర్‌గా ఉన్న ఆజమ్‌ ఖాన్‌ను అన్ని మ్యాచ్‌లలో ఆడిస్తారని భావించా. కానీ ఒక్క మ్యాచ్‌లో డకౌట్‌ కాగానే బెంచ్‌పై కూర్చోబెట్టారు. మళ్లీ ఛాన్స్‌ కూడా ఇవ్వలేదు. ఆజమ్ ఖాన్‌ లాంటి యువ ఆటగాళ్ల ఉత్సాహాన్ని ఆదిలోనే నీరుగార్చారు’ అని మొయిన్ ఖాన్ అన్నాడు.‘ఇలా తుది జట్టులో తరచూ ప్లేయర్లను మార్చివేస్తూ ఉంటే.. పటిష్ట జట్టు ఎలా తయారవుతుంది. కనీస సంఖ్యలోనైనా అవకాశాలు ఇవ్వాలి కదా. లేకపోతే.. మంచి ఆటగాళ్లు ఎక్కడి నుంచి పుట్టుకొస్తారు? టీ20 ప్రపంచకప్‌ 2022 సమయంలో రమీజ్‌ రాజా నా కుమారుడు ఆజమ్‌ ఖాన్‌ను ఉద్దేశపూర్వకంగా జట్టు నుంచి తప్పించాడు. సెలక్టర్లు ఆజమ్‌ ఖాన్‌ను ఎంపిక చేసినా కావాలనే పక్కనపెట్టాడు’ అని మొయిన్ ఖాన్ వ్యాఖ్యానించాడు. వికెట్‌ కీపర్‌ కమ్ బ్యాటర్‌ అయిన ఆజమ్‌ ఖాన్‌ 2021లో పాకిస్థాన్‌ తరఫున అంతర్జాతీయ క్రికెట్‌లో అడుగుపెట్టాడు. ఇంగ్లండ్‌తో తొలి టీ20 మ్యాచ్‌ ఆడాడు. ఇప్పటివరకూ పాక్‌ తరఫున 13 మ్యాచ్‌లు ఆడిన ఈ ప్లేయర్‌.. 135.38 స్ట్రైక్‌రేటుతో 88 పరుగులు మాత్రమే చేశాడు. దీంతో జట్టు నుంచి అతడిని తప్పించాలనే డిమాండ్‌లు వినిపించాయి. కానీ, అనూహ్యంగా అతడు టీ20 ప్రపంచకప్‌-2024 జట్టులో చోటు సంపాదించాడు. మెగా టోర్నీలో ఒకే ఒక మ్యాచ్‌ (అమెరికాతో) ఆడిన ఆజమ్‌ ఖాన్‌ డకౌట్‌ అయ్యాడు. ఈ మ్యాచ్‌లో పాకిస్థాన్‌.. పసికూన అమెరికా చేతిలో ఓడి టోర్నీ నుంచి నిష్క్రమించింది. ఇదే సమయంలో భారీ కాయమున్న ఆజమ్ ఖాన్‌ ఫిట్‌నెస్‌పై కూడా పెద్ద ఎత్తున చర్చ జరిగింది. మొయిన్‌ ఖాన్‌ కొడుకు కాబట్టే అతడి లాంటి ఫిట్‌నెస్‌ లేనివారికి కూడా జాతీయ జట్టులో చోటు దక్కిందని మండిపడ్డారు. అయితే, వీటన్నింటికీ విరుద్ధంగా మొయిన్‌ ఖాన్‌ పీసీబీపైనే విమర్శలు చేయడం గమనార్హం.