- సర్కారు ముందు కీలక సమస్యలు
- వరదలపై కేంద్ర సాయం కోసం తీర్మానం
- కొత్త ఆర్వోఆర్ చట్టం ఆమోదం..?
- విద్య, వ్యవసాయ కమిషన్లకు చట్టబద్ధత
- బీసీ రిజర్వేషన్,కులగణనపై చర్చ
- రెండొందల పంచాయతీల ఏర్పాటుపై ఆర్డినెన్స్ కు సన్నాహాలు
- చర్చకు రానున్న రుణమాఫీ, రైతు భరోసా
- హైడ్రాకు విశేష అధికారాలపైనా కీలక నిర్ణయం
ముద్ర, తెలంగాణ బ్యూ‌‌రో : రాష్ట్ర మంత్రివర్గం నేడు భేటీ కానున్నది. సీఎం రేవంత్ రెడ్డి అధ్యక్షతన సాయంత్రం 4 గంటలకు సచివాలయంలో జరగనున్న ఈ భేటీలో పెండింగ్ లో ఉన్న పలు కీలక అంశాలపై కెబినెట్ కీలక నిర్ణయాలు తీసుకోనుంది. ప్రస్తుత ఆర్వోఆర్ చట్టాన్ని రద్దు చేసి, దాని స్ధానంలో కొత్త ఆర్వోఆర్ చట్టాన్ని కేబినెట్ ఆమోదించనున్నట్లు తెలిసింది. అలాగే ఈ భేటీలో మంత్రివర్గం.. విద్య, వ్యవసాయ కమిషన్లకు చట్టబద్ధత ఇవ్వనుంది. వ్యవసాయ కమిషన్ ఛైర్మన్‌గా కోదండ రెడ్డి, విద్యా కమిషన్ ఛైర్మన్‌గా ఆకునూరి మురళీ నియామకానికి కేబినెట్ ఆమోదం తెలపనుంది.ఇక, తెలుగు యూనివర్సిటీకి సురవరం ప్రతాప్ రెడ్డి, కోఠిలోని ఉస్మానియా మహిళా యూనివర్సిటీకి చాకలి ఐలమ్మ పేర్లను కేబినెట్ ఖరారు చేయనుంది. వీటితో పాటు రేషన్ కార్డులకు సంబంధించిన విధానాలు ఖరారు చేయాలని కేబినెట్ యోచిస్తోంది.
అర్హులైన కుటుంబాలకు రేషన్ కార్డుల పంపిణీలో పారదర్శకతను పెంచడానికి మార్పులు చేర్పులు చేయాలన్న ఆలోచనతో కేబినెట్ నిర్ణయం ఉండబోతున్నట్లు తెలుస్తోంది. రేషన్ కార్డులు పొందే అర్హతలపై సవరణలు చేసి, ప్రజలకు మరింత సౌలభ్యంగా అందజేయాలనే ప్రతిపాదనపై నిర్ణయం తీసుకోనున్నారు. హెల్త్ కార్డుల విషయంలో కూడా మంత్రి మండలి చర్చించనున్నట్లు సమాచారం. ఈ క్రమంలో సాధారణ ప్రజలకు ఆరోగ్య సేవల విస్తరణను సులభతరం చేసేందుకు ఆరోగ్య కార్డుల పంపిణీపై కేబినెట్ కీలక నిర్ణయం తీసుకోనుంది. అలాగే హైడ్రాకు చట్టబద్ధతను తీసుకురావడానికి ఆర్డినెన్స్ ఇచ్చే అంశాలపైనా కేబినెట్ చర్చించనుంది. ప్రస్తుతం 99 జీవో ద్వారా మాత్రమే కొనసాగుతోన్న హైడ్రాకు చట్టబద్ధత కల్పించేలా ఆర్డినెన్స్ ఇవ్వాలని రేవంత్ సర్కార్ భావిస్తున్నది. ఇక రైతుల సంక్షేమంపై ప్రత్యేక దృష్టిసారించిన ప్రభుత్వం రైతు భరోసా పథకంపై కేబినెట్‌లో చర్చిస్తుందని అధికార పార్టీలో చర్చ జరుగుతున్నది. దీని అమలుకు సంబంధించి కెబినెట్ భేటీలో రోడ్ మ్యాప్ ఖరారు చేయనున్నట్లు సమాచారం.
సీఏంఆర్ఎఫ్ నిధుల భారీ వ్యయాన్ని తగ్గించడానికి ఈ నిర్ణయం తీసుకోవాలని ప్రభుత్వం భావిస్తోంది. కాగా ప్రధానంగా ఇటీవల కురిసిన భారీ వర్షాలు, వరదలు రాష్ట్రంలోని పలు ప్రాంతాల్లో సంభవించిన ఆస్తి, పంట, ప్రాణ నష్టాన్ని కేంద్రం దృష్టికి తీసుకెళ్లడానికి, సహాయం కోరుతూ తీర్మానం చేసి కేంద్రానికి పంపాలని రాష్ట్ర కేబినెట్ భావిస్తున్నది. మొదట్లో రూ. 5వేల పైచిలుకు కోట్ల ప్రాథమిక అంచనా వేసిన సర్కార్ తాజాగా రూ.పదివేల కోట్ల నష్టం జరిగిందని తుది నివేదికను సిద్ధం చేసింది. ఈ క్రమంలో ఇటీవల రాష్ట్రంలో పర్యటించిన కేంద్ర బృందానికి ఆ నివేదికను అందజేసింది. మరోవైపు వారితో ప్రత్యేకంగా భేటీ అయిన సీఎం రేవంత్ రెడ్డి, మంత్రులు, ప్రభుత్వ ప్రధాన కార్యదర్శి శాంతికుమారి ప్రాంతాలు, రంగాల వారీగా జరిగిన నష్టం, నిర్వాసితుల దుస్థితిని వారి దృష్టికి తీసుకువెళ్లారు. దీంతో కేంద్ర బృందం సైతం రాష్ట్రంలో తీవ్ర వరదనష్టం జరిగిందని ఒప్పుకున్నారు. తాము చూసింది కేంద్రానికి నివేదిక రూపంలో వివరిస్తామని హామీ ఇచ్చారు. దీంతో రాష్ట్ర ప్రభుత్వం కేంద్రం నుంచి వచ్చే నిధులపై భారీ ఆశలు పెట్టుకున్నది. ఈ క్రమంలో అత్యధిక నిధులు రాబట్టేలా అనుసరించాల్సిన వ్యూహాలు,కేంద్రమంత్రులకు విజ్ఙప్తులపై కెబినెట్ లో చర్చించనున్నట్లు విశ్వసనీయంగా తెలిసింది.
