పారిస్ ఒలింపిక్స్ 2024లో జావెలిన్ త్రోలో నీరజ్ చోప్రా, షూటింగ్‌లో మను బాకర్‌.. భారత్‌ తరఫున పతకాలు సాధించారు. అనంతరం పారిస్ వేదికగా వీరిద్దరూ కలిసి మాట్లాడుకోవడంతో పెళ్లి వదంతులు వచ్చాయి. ఇటీవల ఓ కార్యక్రమంలో మను భాకర్ మాట్లాడుతూ.. పారిస్‌లో ఆరోజు ఏం జరిగిందో వివరించింది.
ఒలింపిక్స్ ముగిసిన తర్వాత నీరజ్‌తో మాట్లాడానని, ఆ సంభాషణ తనకు ఎంతో ప్రత్యేకమని మను భాకర్ చెప్పింది. ఒలింపిక్స్ లాంటి మెగా టోర్నీల్లో పాల్గొనే ఆటగాళ్లపై ఎంతో ఒత్తిడి ఉంటుందని.. తానూ చాలా ఒత్తిడిని ఎదుర్కొన్నానని మను భాకర్ తెలిపింది. నీరజ్ చోప్రాతో మాట్లాడిన తర్వాత అతడు కూడా అలాంటి పరిస్థితులను ఎదుర్కొన్నట్లు తెలిసిందని చెప్పింది. నీరజ్‌తో మాట్లాడటం వల్ల తనకు చాలా విషయాలు తెలిశాయని.. ఒత్తిడిని దూరం చేసుకునేందుకు అతడి మాటలు స్ఫూర్తినిచ్చాయని తెలిపింది.
ఇక శనివారం (సెప్టెంబర్ 15) జరిగిన డైమండ్‌ లీగ్‌ ఫైనల్స్‌లో నీరజ్ చోప్రా కేవలం 1 సెంటీమీటర్‌ తేడాతో అగ్రస్థానాన్ని కోల్పోయాడు. ఈ పోటీ అనంతరం ఎక్స్ వేదికగా తన గాయం గురించి వెల్లడించాడు. తన ఎడమ చేతి ఉంగరం వేలికి గాయమైందని.. స్కానింగ్ నిర్వహించగా ఎముక విరిగిపోయినట్లు వచ్చిందని నీరజ్ పోస్టు చేశాడు. నాకిది మరో సవాలు. అయితే నా బృందం సాయంతో బ్రసెల్స్‌లో పోటీపడగలిగా’ అని నీరజ్ రాసుకొచ్చాడు.
నీరజ్ చోప్రా కుడి చేతితో జావెలిన్‌ను విసిరిన తర్వాత కిందపడుతూ ఎడమ చేతిని నేలకు తాకిస్తుంటాడు. ఈ క్రమంలో గాయపడి ఉంటాడని అభిమానులు భావిస్తున్నారు. శనివారం నాటి ఫైనల్స్‌లో మాత్రం ఆరు ప్రయత్నాల్లో.. ఎక్కడా తన ఎడమ చేయి నేలకు తగలకుండా నియంత్రించుకున్నాడు. మూడో ప్రయత్నంలో ఉత్తమంగా 87.86 మీటర్ల దూరం ఈటెను విసిరాడు. అండర్సన్‌ పీటర్స్‌ (గ్రెనెడా) 87.87 మీ. దూరం విసిరి మొదటి స్థానంలో నిలిచాడు.
గాయాలతో సతమతమైనా, గజ్జల్లో గాయం వేధిస్తున్నా నీరజ్ ఈ ఏడాది మంచి ప్రదర్శనే చేశాడు. ‘ట్రాక్‌పై నిలబడే సీజన్‌ను ముగించాలనుకున్నా. నా సొంత అంచనాలను అందుకోలేకపోయినా, ఈ సీజన్‌లో ఎంతో నేర్చుకున్నా. పూర్తి ఫిట్‌నెస్‌ సాధించి, తిరిగి కొత్త సీజన్ మొదలు పెట్టాలనే లక్ష్యంతో ఉన్నా. 2024 నన్ను మరింత మెరుగైన అథ్లెట్‌గా, వ్యక్తిగా మార్చింది. 2025లో కలుద్దాం’ అని నీరజ్ పేర్కొన్నాడు.
